ليش بدك تخدم؟!ليش بدك تخدم؟! بدك تتطوع لمجتمعك؟ التطوع شيء والخدمة المدنية الإسرائيلية شيء ثاني تمامًا؛ التطوع عمل طالع من إرادة ذاتية واقتناع وانتماء للبلد وللمجتمع وبدون أي مقابل مادي، والخدمة المدنية مربوطة برشوة مادية ووعود وامتيازات فردية وهمية وبتركّز على المصلحة الشخصية. في فرق بين إنك تطوع بإرادتك لمجتمعك العربي، من خلال مؤسساتنا وأطرنا الوطنية ومبادراتنا المجتمعية الأصيلة، وبين خدمة إسرائيلية من خلال حكومة عنصرية. بتفكّر إنه لازم نعمل واجباتنا عشان ناخد حقوقنا؟ الحقوق بتطلعلنا بدون شروط لأنه إحنا مواطنين وسكان البلاد الأصليين، ومش عم ناخدها لأنه في عنصرية بكل مجالات الحياة بالدولة وبقوانينها. 60% من الأطفال الفقراء عرب وأول 35 بلد منكوبة بالبطالة عربية وفي 100 ألف عربي عايش بقرى غير معترف فيها بدون مي ولا كهربا، مش لأنه مش عم نخدم لأنه في عنصرية متجذّرة ضدنا. مش واضح إلك يعني؟! عشان يكون إلك أفضلية بالمنح والمناقصات والعمل بالمستقبل؟ البند الأول من تقرير لجنة "عبري"، اللي نصحت الحكومة بفرض الخدمة المدنية على الشباب والصبايا العرب، بأكّد إنه الأفضلية والأولوية لازم تكون دايمًا للخدمة العسكرية، وطبعًا أكثر وأكثر للخدمة العسكرية القتالية. التجربة التاريخية أثبتت إنه حتى الخدمة العسكرية يتلغيش العنصرية والتمييز بالمرة، والقرى العربية الدرزية أكبر مثال. انصياعك لهذا الوهم راح يعطي شرعية للعنصرية المستمرة ضدنا بحجة الواجبات، ومش راح يغيّر الواقع الصعب و أكيد مش راح يحسّن لا من وضعك الشخصي ولا من وضعنا الجماعي. بنضحَك عليك بسهولة؟! مش شايف علاقة بين الشرطة والجيش وبين الخدمة المدنية؟ الخدمة المدنية الإسرائيلية والشرطة وجيش الاحتلال هم نفس الجهاز، مدير مديرية الخدمة المدنية هو المختّص النفسي الرئيسي السابق للجيش، و"الامتيازات" للخادمين هي ضمن قانون "الجنود المسرّحين"، والمسؤول متابعة عمل المديرية هو مجلس "الأمن القومي"، وشهادة الخادم راح تقدّمله إياها وزارة "الأمن". عنجد مش شايف العلاقة؟! متأكّد إنه فش تأثير على هويتك؟ تجنيدك للخدمة المدنية، اللي بترعاها وزارة الحربية الإسرائيلية وديوان رئيس الوزراء شخصيًا، هي كمان عملية غسيل دماغ وتشويه وعي، بتكمّل شغل مناهج التعليم البائسة. أكيد مش راح يعزّزوا انتماءك لشعبك ووطنك ويعلموك تاريخ شعبك ولا أدبه ولا ثقافته، راح يعملوا كل جهدهم عشان تصير إسرائيلي ماشي الحيط الحيط وبتقول يا ربي المنحة!. أكيد مش راح تطلع بعد الخدمة المدنية الإسرائيلية عربي فلسطيني معتّز بهويتك الوطنية وواعي لقضايا شعبك. راح يكون أسهل على أخوك الصغير أو على إبنك يخدم بشي وحدة قتالية بجيش الاحتلال بعد ما تعلّق شهادة "وزارة الحربية" بصدر البيت!. شوف الأمور على حقيقتها! بدك منفعة اقتصادية؟ أكيد الخدمة المدنية الإسرائيلية مش هي عنوانك، المبلغ الهزيل اللي بتوخده شهريًا ما بتغطّي حتى سفرياتك للمؤسسة اللي راح تخدم فيها، والامتيازات الثانية هي مبالغ سخيفة. أي عمل كريم بأي محل راح يعطيك دخل شهري أحسن وراح يساعدك إنك تبلّش خطوات حياتك العملية الأولى بشكل مضمون ونافع أكثر. التعليم الجامعي والمهنة الشريفة وفرص العمل هي اللي راح تضمن منفعة اقتصادية للمدى البعيد، فكّر لبعيد شوي! كل الأحزاب العربية والمؤسسات الأهلية ورجال الدين ضد وانت مع؟! في إجماع شامل بمجتمعنا العربي، بشمل كل التيارات والأحزاب والحركات والهيئات التمثيلية السياسية العربية، والمؤسسات الأهلية الوطنية، ورجال الدين العرب، والقيادات الشبابية، ضد الخدمة المدنية الإسرائيلية، بسبب خطرها على هويتنا الوطنية وتشويهها لنضالنا العادل ضد التمييز القومي ولأجل حقوقنا كأفراد وكجماعة. كلنا ضد الخدمة وانت مع؟ الخدمة المدنية..طريقك للجيش الإئتلاف الشبابي ضد الخدمة المدنية: "الائتلاف الشبابي ضد الخدمة المدنية" هو مجموعة كبيرة من الناشطين والناشطات الشباب في مختلف الأطر والقوى السياسية والاجتماعية الوطنية التي تجمعت في إطار واحد، بهدف توحيد كل القوى والطاقات من أجل العمل لصدّ مشروع الخدمة المدنية الإسرائيلية على الصعيد الشعبي والقانوني والإعلامي والتوعوي.